اكلات صحية والحمية

رمضان و الاولاد في زمن الكورونا

انا عارفة ان العنوان يخض كل ام وزمانكم بتعيطوا دلوقتي ...يلا ...كلنا لها

كل سنة و انتم طيبين ....رمضان جانا ...بس السنة ديه غير اي سنة ....السنة ديه رمضان من ""منازلهم ""...يعني مافيش زيارات عائلية و لا عزومات و لا فطار برا في مطاعم (يعني مش حتعرفي تهربي من الطبخ كل يوم يا مامي)

طيب ايه ....حنعمل ايه ...حنطبخ ازاي طول الشهر و العيال معانا في البيت ؟؟
امال انا بعمل ايه؟

لا ميروحش مخكم لبعيد ...مش حطبخلكم هههه

انا بس حقولكم افكار تشغل الاولاد عنكم في الوقت اللي انتم فيها في المطبخ.

أولا:

حاجة لطيفة جدا قبل رمضان انهم يعملوا معانا تحضيرات رمضان ...زي عمل الزينة وتعليقها (كاننا بنعمل اشغال يديوية... وده مناسب لكل اعمار اولادنا) كمان ممكن يساعدونا في التفريز:فصفصة البسلة (من سن 3 سنين...بتقوي عضلات اليد الدقيقة) ، تعبئة الطامطم المعصورة واللحمة المعصجة في اكياس (من سن 5 سنوات ....بيزد التركيز) وكذلك كل تحضيرات رمضان.

ثانيا :

قبل رمضان بيومين مهم اوي نتكلم مع اولادنا عن الشهر الكريم وفضله ونزول القرآن فيه ،ممكن في شكل قصة أو مسرح عرايس للاطفال اقل من 10 سنين وممكن بشكل مباشر للاطفال اكبر من ذلك.

مهم اوي يعرفوا احنا ليه نصوم ..محدش يقول لابنه عشان نحس بالفقراء ...عشان حيقوله طيب ليه مش بنشرب ...مالفقراء مش محرومين من المايه ههههه.

احنا بنصوم طاعة لله فقط ..زى الصلاة و الزكاة ...ربنا امر واحنا بنطيع ... واجتهاد مننا ممكن نفكر في حكمته من الصيام ..هو تدريب المؤمن على ظبط النفس ...فاحنا بنمنع نفسنا عن شئ مباح في نهار رمضان (اللي هوالاكل والشرب) عشان ربنا امرنا بذلك ..فنتعود على ترك اي محرمات طاعة لله باقي شهور السنة

ثالثا

مهم جدا نعمل مع اولادنا جدول لليوم في رمضان ويجب ان يتضمن وقت للاذكار وقراءة القرآن وقت تاني لحكاية سيرة الرسول او قصص الانبياء او الصحابة ووقت للمساعدة في تحضير الاكل مثال :تذوق الاكل (مناسب للاطفال تحت سن السابعة عشان مش بيكونوا صايمين) ،تحضير السفرة (مناسب من سن 6 سنين) ، تقطيع الكنافة بالايد (مناسب من سن 3 سنوات) ، المساعدة في عمل الحلويات كحشو القطايف والسمبوسك ( مناسب من سن 6 سنوات) و وهكذا.

وحنحدد اول كل اسبوع مهمة كل فرد من افراد الاسرة وتتغير كل اسبوع عشان نقلل الملل و نزود حماسهم لتعلم مهارات جديدة.

رابعا :

مش حننسى ان الدراسة لسة مكملة فكل طفل (حتى من سن سنتين) مطلوب منه على الاقل نصف ساعة الى ساعتين مذاكرة كل يوم حسب السن.

خامسا :

: بليل ممكن يتقسم مابين صلاة التراويح ، مهم اوي نحيها في بيوتنا (لانها مش حتتصلى للاسف في المساجد) ولو ركعتين.

واخيرا لازم يكون في وقت للترفيه

ومهم اوي نستفيد من جلوسنا في البيت مع اولادنا اننا نلعب معاهم
وديه بعض الانشاط /الالعاب (حسب السن) اللي ممكن نمارسها مع اولادنا في ايام رمضان وبتنمي مهارات كتيرجدا عندهم

سن سنتن الى 4

1. عمل اشكال و حيوانات بالمكعبات
2. عمل اشكال بالصلصال
3. لعب بولينج ( باستخدام كرات بلاستك وزجاجات اللبن البلاستك الفارغة)
4. عمل لهم مسرح عرايس (باستخدام حبل غسيل - ملاية - اي عرايس أو دباديب في البيت)

من سن 4 سنوات الى 7

1. الالعاب الورقية (كوتشينة / UNO)
2. العاب التفكير (كونكت فور- شطرنج...)
3. العاب الزهر (السلم والتعبان – الطاولة )
4. عمل اورجامي ""Oragmi (عمل اشكال بتطبيق الورق بدون قص و لصق)
5. عمل اشغال يدوية (Craft)
6. عمل خيمة في البيت
7. عمل فانوس كبير
8. عمل تمارين رياضية
9. تلوين
10. اللعب باليجو Lego

من سن 7 سنوات الى 12 سنة

1. العاب ورقية (Bingo- Stop it is complete)
2. لعب الشطرنج
3. قراءة قصة صغيرة و مناقشتها
4. رؤية فيلم وثائقس و مناقشته
5. العاب الالواح (بنك احظ Monopoly – )
6. عمل مسابقة رسم
7. كتابة قصة
8. زراعة بعض النباتات في البلكونة